Ngā kāri pōtingāwari me ngā mōkihi e tukuna ki ngā kaipōti
E whakahaeretia ana tētahi tukutanga mēra pōtitanga nui o ngā kāri PōtiNgāwari 2.9 miriona me ngā mōkihi pārongo, ina ko tā Te Tari Pōti Matua he mahi ki te tino whakamāmā i te pōti i te pōtitanga whānui 2008.
Ko te mōkihi pārongo PōtiNgāwari te whakaputanga kōrero pōtitanga whai mana mai i te Āpiha Pōtitanga Matua ki ia kaipōti rēhita.
“Kei roto i te mōkihi pārongo PōtiNgāwari tētahi kāri PōtiNgāwari whaiaro mō te kaipōti hei heri māna ina haere ia ki te pōti,” e kī ana a Robert Peden, Āpiha Pōtitanga Matua.
“Kei runga i te kāri PōtiNgāwari te ingoa me te wāhi noho, te rohe pōti me tōna ingoa i runga i te rārangi pōti. He whakatere me te whakangāwari mō te kaipōti kia tukuna he pepa pōti ki a ia.”
Kei roto anō i te mōkihi pārongo PōtiNgāwari ngā pārongo matua mō te wāhi hei haere ki te pōti, ngā rārangi rōpū tōrangapū, ngā kaitono mō te rohe pōti me ngā pārongo e pā ana ki te MMP.
“E aki ana mātau i ngā kaipōti ki te heri i ā rātau kāri PōtiNgāwari me rātau mēnā e pōti tōmua ana, kei te pōti rānei i te rā pōti,” te kī a Mr Peden.
Ka taea e ngā tāngata te pōti me te kore kāri PōtiNgāwari engari he tōmuri ake tēnei.
Ko ngā tāngata katoa i rēhita i muri i te 8 o Whiringa ā-Nuku ka whiwhi i tētahi mōkihi pārongo PōtiNgāwari, e mau ana hoki i tētahi reta (engari kāore he kāri) hei heri ina pōti.
“Tirohia te mōkihi PōtiNgāwari mō te kimi i te wāhi pōti, pōti tōmua hoki e tūtata mai ana ki tō kāinga,” e kī ana a Mr Peden.
“He wā oreore te wiki e whai ake i te wā o te pōtitanga i te mea ka maha haere te aro mai o ngā kaipōti ki te pōtitanga. E mōhio ana mātau ko ngā mōkihi pārongo PōtiNgāwari tētahi rauemi whai take, whai wā hoki hei whakamāmā i te pōtitanga.”
E whakamaharatia anō ngā tāngata ki te rēhita mēnā kāore anō kia rēhita.