Me takatū mō ngā pōtitanga ā-rohe
Kua tae ki te wā me titiro nēi tika tō rēhitatanga mō te pōti i ngā pōtitanga ā-rohe i tēnei tau.
I ngā wiki e rua e tū mai nei, ka tukua atu he mōkī rēhitatanga i te mēra ki ngā tāngata katoa o te rārangi pōti, kia titiro ai tātau nēi tika ngā taipitopito mō tātau. E 3.65 miriona aua mōkī.
“He pōtitanga mēra ngā pōtitanga ā-rohe. Tirohia tō wāhi noho e ai ki te rārangi, kia tika ai te rere atu o ō puka pōti ki a koe ā te Oketopa,” te kī a Anusha Guler, Amo Torotoro.
“Ka āhei ngā kaipōti Māori ki te kōwhiri i te rārangi Māori, i te rārangi whānui rānei mō ngā pōtitatanga ā-rohe. Kāhore e āhei tātau ki te whakawhiti rārangi i ngā marama e toru i mua i ngā pōtitanga, nō reira, ki te hiahia koe ki te whakawhiti rārangi, me whakatutuki i mua i te waenganui pō i te 10 o Hūrae.
“Ka pā mai ngā whakataunga a ngā kaunihera ki ngā āhuatanga o tō tātau ao o ia rā me ō tātau hapori hoki – he reiti, he tangohanga rāpihi, he pāka, he waka tūmatanui, he aha rānei. He mea nui kia rēhita koe kia puta ai ō whakaaro,” hei tā Anusha Guler.
“Ina tae atu tō mōkī ki a koe, tirohia ngā taipitopito mōu. Nēi tika, kua takatū koe ki te pōti i ngā tāngata hei māngai mōu i ngā kaunihera ā-tāone, ā-rohe, ā-takiwā rānei.
“Ki te hiahia koe ki te whakahou i aua taipitopito, ka āhei ki te tuhi i ngā whakatikahanga ki te puka kei roto i te mōkī, ka whakahoki mai ai. Ka āhei hoki ki te rēhita mai, ki te whakahou rānei i ngā taipitopito mōu ki vote.nz.
“Ki te kore e whiwhi koe i tō mōkī i mua i te 14 o Āperira, he tohu tēnā kāhore anō koe kia rēhitatia mai, me whakahou rānei i tō wāhi noho i te rārangi pōti.
“Ko tā mātau inoi hoki i tēnei tau, kia tāpirihia mai tētehi wāhi īmēra me tētehi nama waea, kia ngāwari ake ai te huri i ngā whakawhitiwhiti kōrero kia matihiko ā tōna wā,” hei tā Anusha Guler.
Ko te mahere wā mō ngā pōtitanga ā-rohe
1 o Āperira Ka tīmata Te Kaitiaki Take Kōwhiri ki te whakatenatena i te motu ki te rēhita mai
10 o Hūrae Ka mutu te wā e āhei nei a ngāi Māori ki te whakawhiti rārangi i mua i ngā pōtitanga ā-rohe
1 o Ākuhata Me rēhita mai te tangata i mua i te 1 o Ākuhata e whiwhi ai i ngā puka pōti i te mēra
Hepetema Ka tukua atu ngā puka pōti e ngā kaunihera
11 o Oketopa Ka kati te pōtitanga ā te Hātarei te 11 o Oketopa i te rānui