Kua whakaputaina ngā rohenga pōti e marohitia ana
E marohitia ana e te Kōmihana Whakatau Rohe Pōti ngā whakarerekētanga ki te haurua o ngā rohe pōti o Aotearoa me te whakatū i tētahi rohe pōti hou i te tonga o Tāmaki Makaurau.
Kua whakaputaina e te Kōmihana tana pūrongo i tēnei rā mō ngā rohenga e marohitia ana me ngā ingoa o ngā rohe pōti mō ngā pōtitanga whānui e rua e whai ake. Ka taea e te iwi whānui te whakaputa i ō rātau whakaaro i mua i te whakataunga o ngā rohenga ā te Paengawhāwhā 2020.
"Ina taea kua puritia ngā rohenga onāianei hei whakaiti i te rahinga o ngā tāngata ka whai pānga ki te whakarerekētanga o ngā rohenga pōti me ngā ingoa. O ngā rohe pōti 71 onāianei, 36 ka mau tonu. E whakaata ana ngā whakatikatanga i ētahi atu rohe i ngā huringa ki te taupori mai i te tau 2014 i te arotakenga whakamutunga o ngā rohenga," te kī a te heamana o te Kōmihana Whakatau Rohe Pōti a Kaiwhakawā Craig Thompson.
Ko ngā wāhi huringa nui rawa kei te rohe o Tāmaki Makaurau, Ōtautahi, Ōtākou me Murihiku.
"I te rohe o Tāmaki Makaurau, ka piki te maha o ngā rohe pōti whānui mai i te 24 ki te 25. Ko te rohe pōti hou e marohitia ana ko Flat Bush. Ka whakauru mai i ētahi wāhi o ngā rohe pōti onāianei o Hunua, Manurewa me Papakura," te kī a Kaiwhakawā Thompson.
"E hiahiatia ana ngā whakarerekētanga ki ngā rohenga i te takiwā o Ōtautahi nā te tino nui o te tipu o te taupori i Selwyn, ā, koinei te rohe pōti tere rawa te tipu i te Aotearoa katoa."
I Ōtākou me Murihiku, e hiahiatia ana ngā whakatikatanga ki ngā rohenga o ngā rohe pōti o Waitaki, Dunedin North, Dunedin South, Clutha-Southland me Invercargill.
E wātea anō ngā kōrero whānui ake mō ngā whakarerekē e marohitia ana i vote.nz, ā, kei roto anō i te pūrongo Ngā Rohe Pōti e Marohitia Ana 2019 e wātea ana i ngā whare pukapuka, ngā tari kaunihera, ngā tari o Te Kaitiaki Take Kōwhiri me ngā tari ā-rohe o Te Puni Kōkiri.
"E whakahau ana mātau i ngā tāngata kia āta tirohia ngā huringa me ngā pānga ki a rātau. Ka taea e te iwi whānui te tuku whakahē mō ngā rohenga me ngā ingoa e marohitia ana atu ki te 20 o Hakihea," te kī a Kaiwhakawā Thompson. He wā anō kua whakawāteahia mai mō te ātete i ngā whakahē mai i te 10 ki te 24 o Kohitātea, ā, ka tū ngā whakawātanga tūmatanui ā te Huitanguru.
Koinei ngā huringa matua kua marohitia e te Kōmihana Whakatau Rohe Pōti:
Ngā rohe pōti o Te Ika-a-Māui
- Kua tātuhia anō a Rodney kia uru atu ai a Dairy Flat me Coatesville, ā, kua tapaina ko Whangaparāoa
- Kua whakawhānuitia a Helensville ki roto o Northland, Rodney (ko Whangaparāoa ināianei), me Upper Harbour, ā, kua taka atu a Waitākere Ranges ki roto o New Lynn
- Nā te tipu o te taupori i New Lynn mai i te taha raki me whakarerekē a Mt Roskill, Maungakiekie, Manukau East, me Manurewa
- Ka hangaia a Flat Bush mā te tango mai i ngā taupori mai i ngā rohe pōti onāianei o Hunua, Manurewa me Papakura, ā, kei roto a Wattle Downs me Takanini i tēnei
- Ka tāpirihia te taupori mai i Waikato ki a Hunua, ā, kua tapaina ko Port Waikato. Ka whakarerekēhia anō ngā rohenga o Waikato ki a Coromandel, Hamilton West me Taupō
- Kua whakarerekēhia anō ngā rohenga o Whangārei me Bay of Plenty
Ngā rohe pōti o Te Waipounamu
- Kua nekehia a Brightwater mai i Nelson ki West Coast-Tasman
- Kua tātuhia anō a Selwyn, ā, kua kore a Horomaka i roto. Kua whakatikahia anō a Ilam, Wigram, Port Hills (kua tapaina ko Banks Peninsula), Christchurch East me Rangitata
- Kua uru atu te takiwā o Alexandra me Clyde ki roto o Clutha-Southland mai i Waitaki
- Kua nekehia te Otago Peninsula mai i Dunedin South ki Dunedin North, a, kua tāpirihia a South Otago ki Dunedin South mai i Clutha-Southland
- Kua tāpirihia a Winton me The Catlins ki Invercargill mai i Clutha-Southland.
Ngā rohe pōti Māori
- Ka whakaurua ki Tāmaki Makaurau tētahi wāhanga i te tonga o Te Atatū mai i Te Tai Tokerau, me tētahi wāhi o te rāwhiti o Manurewa mai i Hauraki Waikato
- He whakatikatanga iti noa ki a Ikaroa-Rāwhiti me Te Tai Tonga i Naenae.
Ngā ingoa o ngā rohe pōti
E whā ngā whakarerekētanga ki ngā ingoa rohe pōti e marohitia ana: Kua huria a Rodney ki a Whangaparāoa, a Hunua ki a Port Waikato, a Rimutaka ki a Remutaka, me Port Hills ki a Banks Peninsula.
Maha o ngā rohe pōti
Ka piki te maha o ngā rohe pōti mai i te 71 ki te 72. Kua whakapūmauhia te maha o ngā rohe pōti whānui o Te Waipounamu ki te 16, ka piki te maha o ngā rohe pōti i Te Ika-a-Māui mai i te 48 ki te 49, ā, ka noho tonu te maha o ngā rohe pōti Māori ki te whitu.
Tangata whakapā pāpāho: Clare Pasley, 027 551 7845, media@elections.govt.nz
Ka taea te tuku mapi jpeg/png mō ia rohe pōti. Mō ētahi atu mōhiohio me ngā mapi ki te taumata tiriti, haere ki vote.nz