Kua tau ngā rohenga o ngā rohe pōti
Kua tukua e Te Komihana Whakatau Rōhe Pōti ngā rohenga whakamutunga me ngā ingoa mō te pōtitanga whānui e tū mai nei.
Kei te mau tonu ngā rohenga rohe pōti o te wā nei mēnā i taea. He tekau mā iwa ngā rohe pōti kāore i panonitia, ā, ko ngā rohenga o ngā rohe pōti whānui 49 me ngā rohe pōti Māori e toru i whakatikatikahia.
Ko ngā wāhi matua o ngā panoni kei Tāmaki Makaurau, Te Waiariki, Ōtautahi me te Upoko o te Ika-a-Māui, otirā koinei ngā wāhi kua whakarerekētia ngā rohenga pōti hei whakaiti i te maha o ngā rohe pōti mā te kotahi.
"Ko te nuinga o ngā pnaoni rohenga i tohua kētia i roto i te pūrongo o ngā rohe pōti e marohitia ana, i tāia i te Māehe 2025, engari kua paku whakarerekētia i muri i ngā whiriwhiri kōrero ki te iwi tūmatanui," hei tā Kaiwhakawā Kevin Kelly, te Upoko o te Komihana Whakatau Rohe Pōti.
He 717 ngā tāpaetanga ā-tuhi e pā ana ki ngā rohenga i marohitia, ā, i tū ngā hui tūmatanui i te marama o Hune.
"I ngākaunui mātou ki te tokomaha o ngā tāngata i aro nui ki tēnei mahi hirahira. He hua nui ngā tāpaetanga tūmatanui maha," hei tā Kaiwhakawā Kelly.
Ko ētahi o ngā whakahoutanga, atu i te raki ki te tonga.
- Ko tētahi wāhi kei te takiwā o Balmoral ka noho tonu ki Epsom kaua ko te nuku ki Mt Albert. Ka nuku tētahi wāhanga o Arch Hill i Auckland Central ki Mt Albert.
- Kua kore e nukua tētahi wāhi whakatetonga o Tauranga i te taha raro o Te Kaimai, ki Rotorua engari ka noho tonu ki Tauranga. He iti noa ngā panoni ki ngā rohenga i waenga o Mt Maunganui me Rotorua.
- Kua kore ngā panoni rohenga i marohitia mō te raki o Tūranga e mana. Engari, ka whiwhi wāhi tuawhenua hou a Napier atu i Tukituki.
- Ka noho tonu a Redwood ki Christchurch Central, ā, ka whiwhi wāhi hou a Christchurch East i Christchurch Central i Linwood me Phillipstown.
- I ngā rohe pōti Māori, kua whakaūngia te panonitanga o te rohe i waenga i Te Tai Tonga me Ikaroa-Rāwhiti, ā, he paku panoni ā-hangarau ki te rohenga i waenga o Te Tai Tonga me Te Tai Hauāuru.
Ko te hua o ngā tāpaetanga, e whā atu anō ngā panoni ingoa rohe pōti. Ko te ingoa i marohitia mō te rohe pōti o Rānui kua huri ki Henderson. Kua huri a East Coast ki East Cape, a Wellington Central ki Wellington North, ā, me Rongotai ka huri ki Wellington Bays.
"He nui ngā kōrero i whiwhi ai mātou i ngā kainoho o Ashhurst mō te marohitanga ki te whakauru i a ia ki roto o Wairarapa kaua ki Palmerston North, ki Rangitīkai rānei. Ka tirohia e mātou ngā kōwhiringa ki te karo i tēnei panoni, engari he uaua rawa i te mea ka mate ki te panoni nui i ngā rohe pōti huri āwhio i a ia, puta noa i te taha runga me te puku o Te Ika-a-Māui.
"Ina titiro whānui, ki ō mātou whakaaro kua tau tika i a mātou te tauritenga, kia ōrite ai te maha o te tangata ki ia rohe pōti, e ai ki ngā herenga o te Ture Pōtitanga," hei tā Kaiwhakawā Kelly.
Ka whakamahia ngā rohenga me ngā ingoa whakamutunga o ngā rohe pōti hei te pōtitanga whānui e tū mai nei. Ko ngā pōtitanga whakakapi ka tū i mua o taua pōtitanga, ka whakahaeretia ki ngā rohenga o ngā rohe pōti o te tau 2020.
E whai ake nei he whakarāpopoto o ngā panoni matua. E wātea ana te pūrongo whānui a te Komihana Whakatau Rohe Pōti me ngā mapi o ngā rohenga whakamutunga ki vote.nz/boundary-review.