Media & news Te hunga pāpāho me ngā rongo kōrero

Back to all media & news

Ka whakahaerehia he arotake i ngā rohenga pōti

Oct 17, 2019 | Media release

Kua tata te tīmata a te Kōmihana Whakatau Rohe Pōti i ngā mahi ki te whakariterite i ngā rohenga pōti mō ngā pōtitanga whānui o te tau 2020 me te tau 2023.

Ko te Kōmihana Whakatau Rohe Pōti te rōpū motuhake e arotake ana me te whakatikatika i ngā rohenga pōti me ngā ingoa o ngā rohe pōti whai muri i ia tatauranga pōti me te Kōwhiringa Pōti Māori.

I whakaputaina e te Kaitatau a te Kāwanatanga te maha o ngā rohe pōti mō ngā pōtitanga whānui e rua e whai ake, i te 23 o Mahuru. Nā te tipu o te taupori mai i te wā o te Tatauranga Whānui whakamutunga, kua puta tētahi rohe pōti whānui hou kotahi. Ka piki te maha o ngā rohe pōti whānui o Te Ika-a-Māui mai i te 48 ki te 49, kei te mau tonu te maha o ngā rohe pōti whānui o Te Waipounamu ki te 16, ā, ka mau tonu te maha o ngā rohe pōti Māori ki te whitu.

Kei te Kōmihana Whakatau Rohe Pōti te mahi ināianei ki te whiriwhiri i ngā rohenga pōti. I kī te Kaiwhakawā a Craig Thompson, ko ia te heamana o te Kōmihana, ko te arotake he wāhanga hira o ngā mahinga pōti.

"Ko tā mātau mahi he arotake i ngā rohenga pōti onāianei hei whakaata i te huringa o te taupori. Ka whakarite tēnei kei te āhua ōrite te tokomaha o ngā tāngata e noho ana i roto kia ōrite ai te whai kanohi o te tangata ki rō Pāremata."

Hei tā Kaiwhakawā Thompson ka tīmata te arotake hei tēnei marama tonu, ā, he ono marama ka oti.

"Ka whai wāhi te iwi whānui ki te whakaputa i ō rātou whakaaro mō ngā rohenga pōti me ngā ingoa rohe pōti ina whakaputahia mai hei kōrerotanga mā te iwi whānui ā te Whiringa-ā-rangi."

E toru ngā wāhanga mō te whakawhitiwhiti kōrero tūmatanui ka tīmata atu me ngā whakahēnga ā-tuhi, whai muri iho ko ngā ātete ā-tuhi ki ngā whakahē, me ngā hui tūmatanui.

Ka whiriwhirihia e te Kōmihana Whakatau Rohe Pōti ngā tāpaetanga pōti katoa i mua i te whakaputa i ngā rohe pōti whakamutunga ā te Paengawhāwhā 2020. Ka mana ngā rohenga pōti hou hei te katinga o te Whare Pāremata onāianei.

Ko ngā mema o te Kōmihana Whakatau Rohe Pōti ko:

  • Heamana – Kaiwhakawā Craig Thompson
  • Kairūri Matua – Anselm Haanen
  • Kaitatau Tuarua a te Kāwanatanga – Carol Slappendel
  • Āpiha Pōti Matua – Alicia Wright
  • Heamana Kāwanatanga ā-Rohe – Brendan Duffy
  • Māngai nō te Kāwanatanga – Hon Rick Barker
  • Māngai nō te Apitihana – Hon Roger Sowry

Ina whiriwhirihia ana ngā rohenga pōti Māori ko ngā mema anō mō tēnei ko:

  • Te Pou Whakahaere. o Te Puni Kōkiri – Dave Samuels
  • Māngai Māori nō te Kāwanatanga – Moana Mackey
  • Māngai Māori nō te Apitihana – Dan Te Kanawa

Kua whakaritea e te Kōmihana Whakatau Rohe Pōti te wātaka e whai ake mō te arotake rohenga pōti.

Arotake i te rohenga pōti 2019/20
21 o Whiringa-ā-nuku 2019 - Ka hui te Kōmihana Whakatau Rohe Pōti ki te whakatakoto i ngā rohenga pōti e marohitia ana
20 o Whiringa-ā-rangi 2019 - Ka whakaputaina ngā rohenga pōti e marohitia ana hei kōrerorero mā te iwi whānui
20 o Whiringa-ā-rangi ki te 20 o Hakihea 2019 - Ka whai wāhi te iwi whānui ki te tuku whakahē mō ngā rohenga pōti
10 ki te 24 o Kohitātea 2020 - Ka taea e te iwi whānui te ātete i ngā whakahēnga kua tāpaetia
10 ki te 19 o Huitanguru 2020 - Ngā hui tūmatanui mō ngā whakahēnga me ngā ātete ki ngā whakahē
20 o Paenga-whāwhā 2020 - Ka whakaputaina ngā rohenga pōti kua whakatauhia
Pōtitanga Whānui 2020 - Ka mana ngā rohenga pōti hou

Previous
Next