Whakauru Tae Noa Te Wenerei/Rāapa 25 Mei/Haratua Kia Ngāwari Ake Tō Pōti I Te Pōtitanga Motuhake O Te Tai Tokerau
Meinga kia tino ngāwari rawa te pōti ki te pōtitanga motuhake o Te Tai Tokerau ā te Rāhoroi 25 Hūne/Pipiri mā tō whakauru ki te rārangi ingoa pōti tae noa mai tērā Wenerei/Rāapa.
“Ko te Wenerei/Rāapa 25 Mei/Haratua te rā kati mō te whakauru kia whakaritea ka whiwhi kāri PōtiNgāwari i te mēra, kia uru hoki ki te tānga o te rārangi ingoa pōti ka whakamahia ki ngā wāhi pōti me ngā wāhi pōti tōmua,” e kī ana a Stephen Hansen, te Kairēhita Kaipōti mō te rohe pōti o Te Tai Tokerau.
“Ki te mea kāore anō kia whakaurua, kua nuku whare rānei, ā, kāore anō kia whakahōu ake i ō kōrero wāhi noho ki a mātou, me whakauru anō koe ināianei.”
He tere, he ngāwari te whakauru ki te rārangi pōti. E wātea ngā puka whakauru i te paetukutuku pōtitanga www.elections.org.nz, mā te waeatuhi koreutu i tō ingoa me tō wāhi noho ki 3676, i tētahi PostShop, mā te waea koreutu 0800 ENROL NOW (0800 36 76 56) rānei. Ka taea e ngā tāngata te whakahōu ake i ā rātou kōrero i tētahi puka whakauru hōu, mā te haere rānei ki www.elections.org.nz.
“Mēnā he hoa tōu, he mema whānau, tētahi tangata hōu rānei ki tō hapori tērā pea kāore anō kia rite ki te pōti i te pōtitanga motuhake, kōrerotia ki a ia kia whakauru ināianei,” e kī ana a Stephen Hansen.
E whaimana ai koe ki te pōti ki te rohe pōti o Te Tai Tokerau:
- Kia 18 neke atu ō tau; ā
- Nō ngā kāwai Māori nō Aotearoa koe; ā
- He kirirarau nō Aotearoa koe, he kainoho pūmau rānei kua noho pūmau hoki ki Aotearoa mō te 12 marama i tētahi wā; ā
- Kua noho kotahi marama neke atu ki te rohe pōti o Te Tai Tokerau.