Ko te Wiki o te Reo Māori tētahi wā pai hei whakauru ki te pōti
E aumihia ana e te Electoral Enrolment Centre (EEC) te tīmatanga o te Wiki o Te Reo Māori i tēnei rā, Mane te 4 o Hōngongoi.
“Ko te Wiki o te Reo Māori tētahi wā pai hei whakamahi i tōu reo ake hei kōrero i te reo Māori, waihoki he wā pai te tau pōtitanga hei whakamahi i tōu reo hei whakapuaki i tōu whakaaro mā wai te whenua e whakahaere,” e kī ana a Murray Wicks, Kaiwhakahaere ā-Motu, te Electoral Enrolment Centre.
“E whakaputa ana te Electoral Enrolment Centre i te whānuitanga o ngā rauemi ki te reo, otirā e ū ana mātou kia āhei ngā tāngata katoa ki ō mātou mōhiohio katoa,” e kī ana a Wicks.
Ko te uru ki te rārangi pōti te hipanga tuatahi ki te whai wāhi ki te Pōtitanga Whānui o tēnei tau me te Tāpaetanga mō te Pūnaha Pōti.
“E whai ana te EEC ki te whakarahi i te wāhi pōti o Ngāi Māori, ā, e whakatītina ana i te katoa ki te whakahōrapa i te kupu ki ō rātou whānau me ō rātou hapori mō te take nei o te whakauru,” e kī ana a Wicks.
I te mutunga o Haratua i tukua atu e te EEC ngā mōkī whakahōu whakaurunga ki ngā tāngata katoa i te rārangi, ki te whakamōhio i a rātou kei te haere mai te pōtitanga me te inoi kia tirotirohia ā rātou kōrero whakauru.
Ko ngā tāngata kāhore nei i whiwhi mōkī kāore anō i whakaurua ki te pōti, ā, me waeatuhi koreutu tō rātou ingoa me te wāhi noho ki 3676, me tiki puka i tētahi PostShop, me waea koreutu rānei ki 0800 36 76 56. E āhei ana hoki te tangata te whakauru me te whakahōu i ngā kōrero mōna i te ipurangi i www.elections.org.nz.
“Otirā he mea nui ake tō tēnei tau i tō mua rā,” e kī ana a Wicks. “Ehara i te mea kei te pōti anake a Aotearoa mō ngā kaitōrangapū me ngā rōpū tōrangapū ka ārahi i te whenua, kei te pōti hoki tātou mō te pūnaha e kōwhiri nei tātou i aua kaitōrangapū.”
Kei www.elections.org.nz ētahi atu mōhiohio mō te whakauru me te pōti.