Ngā rerekētanga kua whiriwhiria mō ngā rohe pōti
Kua pānuitia ngā rohenga pōti hou kua whiriwhiria, mō ngā pōtitanga e rua kei mua – e 61 ngā rohe pōti ka whakarerekētia, me tētahi rohe pōti Whānui kua hangaia ki Auckland, te ingoa ko Howick.
Kua whiriwhiria anō e Te Kōmihana Whakatau Rohe Pōti 2007, he ingoa hou mō ngā rohe pōti e whitu.
Ka āhei te minenga, me ngā rōpū, ki te arotake i ngā rohenga e whakaarotia ana, me te tuku whakahē, ko te 5 o Pipiri, 2007, te rā whakamutunga mō te tuku whakahē.
E kī ana a Kaiwhakawā Bernard Kendall, te Heamana o Te Kōmihana Whakatau Rohe Pōti, “Ko te mahi a Te Kōmihana Whakatau Rohe Pōti, he arotake i ngā rohe pōti ki te whakapūmau ka āhua ōrite tonu te taupori o ia rohe pōti.”
“Inārā, kua whakarerekētia ngā rohenga, kia whakaata i te tiputanga kaha o te taupori kei Auckland, me te tiputanga āta haere noaiho o ngā taupori kei waenganui o Te Ika a Māui, me te wāhanga whakararo o Te Waipounamu. I ngā wāhi i taea, i whai mātou ki te whakamau tonu ki ngā rohenga pōti kua tau kē, me te karo i te wāwāhi i ngā hapori pakupaku.”
Kāhore he Whakarerekētanga ki ngā Rohe Pōti e Waru
Ko te whakaaro a Te Kōmihana Whakatau Rohe Pōti, me noho ōrite hāngai tonu ngā rohenga o ngā rohe pōti e waru. Ko ērā ko ngā rohe pōti o Whangarei, o North Shore, o Northcote, o Tauranga, o Kaikoura, o Ilam, o Te Tai Tokerau, me Waiariki.
Kotahi te Rohe Pōti Tāpiri
I runga i te tiputanga taupori i Te Ika a Māui, kei runga paku ake i Te Waipounamu, kotahi te Rohe Pōti Whānui tāpiri ka hangaia – ka piki te tōpūtanga o ngā rohe pōti Whānui, Māori, ki te 70.
Kua whiriwhiria he rohe pōti Whānui ake, mō Auckland, ko Howick te ingoa. Ka uru mai ki roto i te rohe pōti o Howick, ngā wāhanga o ngā rohe pōti kua takoto kē, o Pakuranga, o Manukau East, me Clevedon.
Ingoa Hou mō Ētahi Ake Rohe Pōti, e Whitu
Kua whiriwhiria he ingoa hou mō ētahi ake rohe pōti e whitu, hei whakaata pai ake i te whānuitanga o ngā rohe pōti e whiriwhiria ana.
Ko aua rohe pōti e whitu, me ngā ingoa hou kua whakaarotia, ko:
- Papakura – hei whakakapi i ngā wāhanga o ngā rohe pōti o Clevedon me Manurewa. Ka whakatūria te pūtake mō te rohe pōti o Papakura ki te taone o Papakura, ka tāpiri mai ko ngā wāhanga o Ardmore me Redhill, o te rohe pōti o Clevedon e takoto ana ināianei, me Wēymouth Road ki te tonga, mai i te rohe pōti o Manurewa.
- Hunua – ka whakakapi i ngā wāhanga o ngā rohe pōti o Clevedon me Port Waikato. Ka tāpiri atu ki roto o Hunua, ko Pukekohe, ko Waiuku, me tētahi wāhi e rere atu ana ki Manukau Heads.
- Ohariu – ka whakakapi i a Ohariu-Belmont – me te nekehanga o te wāhi o Belmont atu ki roto o te rohe pōti o Rimutaka.
- Selwyn – ka hangaia mai i tētahi wàhanga o te rohe pòti o Waimakariri kei Bishopdale, ngà wàhanga o te rohe pòti o Banks Peninsula kei Oaklands me Halswell, me tērà wàhanga o te rohe pòti tawhito o Rakaia, ki te taha raki o te Awa o Rakaia.
- Rangitata – ka whakakapi i ngā wāhanga o ngā rohe pōti o Aoraki me Rakaia. Ka whakatūria te pūtake mō Rangitata ki Ashburton, kia tāpiri atu a Temuka me Timaru.
- Waitaki – ka whakakapi i ngā wāhanga o ngā rohe pōti o Otago me Aoraki. Ka tāpiri atu ki te rohe pōti o Waitaki, ko ngā Rohe o Waitaki, o Waimate, o McKenzie, me tētahi wāhanga o te Rohe o Timaru.
- Pare Hauraki –Pare Waikato – ka whakakapi i a Tainui. Ka tāpiri atu ki roto o tēnei rohe pōti te taupori o te rohe pōti o Tāmaki Makaurau, mai i te wahanga tonga o Manurewa. Kua whiriwhiria ko ngā tāngata o Ngāti Maniapoto nō Tainui, me tāpiri atu ki roto i Te Tai Hauāuru, kia hono atu ki a rātou mā o Ngāti Raukawa.
Ko ngā rohe pōti e takoto ana ināianei o Clevedon, o Port Waikato, o Rakaia, o Aoraki, o Otago, me Tainui, kua whiriwhiria kia riro ki ngā rohe pōti kei runga ake nei.
Kei te wātea ngā whakamāramatanga ake mō ngā whakarerekētanga kua whirwhiria, kei runga i http://www.elections.org.nz, ā, kei roto anō i te pūrongo rāpopoto, me te pūrongo kī, a te Kōmihana Whakatau Rohe Pōti.
“Kei te wātea ināianei, ngā rohenga pōti kua whiriwhiria, mō te minenga ki te tuku kupu whakaaro mai,” e kī ana a Kaiwhakawā Kendall. “Ka taea e ngā tāngata te whakahē, ki te whakahē tautohe, ka āta whakaarotia e te Kōmihana ēnei, i mua o te whakataunga i ngā rohenga whakamutunga.”
Ko te rā kati mō ngā whakahē, ko te 5 o Pipiri 2007.
“Me whakahāngai atu ngā whakahē ki ngā paearu ā-ture, me whakamahia e te Kōmihana,” e kī ana a Kaiwhakawā Kendall. “Te whakamāramatanga o tēnei, he mea whakahirahira kia tirohia ngā pukapuka mō ngā take kua whakarerekētia ngā rohenga, i mua i tā rātou tukuna whakahē mai.”
Ka whakarāpopototia e te Kōmihana ngā whakahē, ka tukuna whakawātea atu ki te minenga. Ka taea e ngā mema o te minenga te tuku whakahē tautohe i waenga i ngā rā, 14 me te 28 o Pipiri, ā, hei te marama o Hōngongoi ka whakahaeretia e te Kōmihana ngā hui minenga. Hei te 26 o Mahuru 2007 ka pānuitia ngā rohenga whakamutunga.
Ka taea te titiro ki ngā rohenga kua whiriwhiria, ki runga rārangi ipurangi kei http://www.elections.org.nz/, kei ngā whare pukapuka, ngā tari a te Kairēhita o ngā Kaipōti, ngā tari kaunihera, ngā pokapū ratonga kaunihera rānei, ngā tari ā-rohe a Te Puni Kōkiri, me ngā tari Rūnanga.
Relevant Resources