Ngā īmera w’akama’ara me ngā pātu’i w’akama’ara - Kōw’iringa Rārangi Pōti Māori
E tukuna ana ki te ‘unga kaipōti Māori ‘e pātu’i, ‘e īmera w'akama'ara mō te 6 o Āku’ata, ko te rangi w’akamutunga ‘ei w’akaw’iti rārangi pōti i mua i te Pōtitanga ā-Motu o tēnei tau.
“I te Āperira i tukuna ai ‘e reta ki ngā kaipōti Māori katoa kua rē’ita kētia e pā ana ki te kōw’iringa rārangi pōti, te rārangi w’ānui me te rārangi Māori. Pēnā kua tukuna kētia mai tō īmera, tō nama wāea rānei ka tuku atu ki a koe ‘e īmera w’aiw’ai, ‘e pātu’i w’aiw’ai rānei i tēnei marama ‘ei w’akama’ara ki te rangi w’akamutunga ‘ei w’akaw’iti rārangi pōti,” e ai ki te Amo Māori a Hone Matthews.
“Ka tāea e koe te rē’ita, w’aka’ou i tō wā’i no’o, te w’akaw’iti rārangi pōti ‘oki ki vote.nz, mā te w’akakī rānei i tēte’i pepa rē’ita. Pēnā i w’iw’i koe i tēte’i reta i te Āperira ka tāea e koe te w’akaw’iti rārangj pōti mā te ‘aina me te tu’i i te rangi ki runga i taua reta, kāta’i ka w’aka’okia mai.”
Mō te kaipōti Māori e ‘ia’ia ana ki te w’akaw'iti atu i te rārangi pōti w’ānui ki te rarangi pōti Māori, i te rārangi poti Māori ki te rarangi pōti w’ānui rānei me w’akaw'iti i mua i te waenganui pō o te Tāite, te 6 o Āku’ata.
Pēnā e pai ana ki a koe ko te rārangi pōti e no’o nā koe, kā’ore koe e mate ki te ma’i, kua pai noa.
“E kore e taea e koe te w’akaw'iti rārangi pōti i ngā marama e toru i mua tonu i te rā pōti, nō reira ki te ‘ia’ia koe ki te w’akaw'iti atu i te rārangi pōti e no’o nā koe me tutuki i a koe i mua i te wā kati,” e ai ki te Amo Māori a Hone Matthews.
Toro atu ki vote.nz mō ēte’i mō’io’io anō, wāea atu rānei ki 0800 36 76 56, tono atu ki tēte’i pepa rē’ita ‘ei tuku atu ki a koe.
Ngā īmera me ngā pātu’i
Ka tukuna atu ngā īmera w’akama’ara a Te Kaitiaki Take Kōw’iri i no-reply@easy.vote.nz me ngā pātu’i i te nama wāea 5101.
Mō ēte’i atu mō’io’io toro atu ki vote.nz/meo-letter
W’akaw'itinga rārangi pōti
I te 31 o Mae’e ki te 30 o ‘Une:
- 4731 ngā tāngata i w’akaw'iti i te rārangi pōti w’ānui ki te rārangi pōti Māori
- 5113 ngā tāngata i w’akaw'iti i te rārangi pōti Māori ki te rārangi pōti w’ānui
- 3381 ngā rē’itatanga ‘ou ki te rārangi pōti
- 2087 ngā rē’itatanga ‘ou ki te rārangi pōti w’ānui
- 15,018 ngā tāngata i w’aka’ou i ā rātou taipitopito, pēnei i te wā’i no’o, engari kāore i w'akaw'iti rārangi pōti.
Ngā rangi matua
| Te 31 o Mae’e | Ngā reta Kōw’iringa Pōti Māori i tukuna mā te pō’i |
| Te 29 - 30 o ‘Une | Ngā īmera me ngā pātu'i i tukuna ki tēte'i rōpū w’āiti ‘ei w’akamātau i te pūna’a |
| Te 6 - 19 o ‘Ūrae |
Ngā īmera me ngā pātu'i w’akama’ara i tukuna ki ngā kaipōti Māori nui ake i te 300,000 |
| Te 21 - 24 o ‘Ūrae | Ngā pātu'i w’akama'ara kua tukuna |
| Te 6 o Āku’ata | Te rangi w’akamutunga ‘ei w’akaw’iti rārangi pōti |
| Te 7 o Āku’ata - te 7 o Noema | Te wā’anga ‘e toru marama te roa e kore e tāea e te ‘unga Māori kua rē’ita kē te w’akaw'iti rārangi pōti. Ka tāea e te ‘unga Māori kāore anō kia rē'ita te rē’ita, te kōw'ir rārangi pōti ‘oki tae noa ki te 25 o Oketopa |
| Te 4 o Oketopa | Rē'ita i mua i te 4 o Oketopa kia w’iw’i kāri PōtiMārire i te pō’i, i te īmera rānei kia tere ake ai, kia ngāwari ake ai te pōti |
| Te 25 o Oketopa | Te rā w’akamutunga ki te rē'ita ‘ei pōti i te Pōtitanga ā-Motu 2026 |
| Te 7 o Nōema | Te rā pōti |