Ko te pau haere te wā whakawhiti rārangi
Ko te pau haere te wā e kōwhiri ai ngā kaipōti Māori i ngā rārangi pōti e hiahia rā rātau mō te pōtitanga ā-motu o tēnei tau – ko te rārangi pōti Māori, ko te rārangi pōti whānui rānei.
Ka kōwhiri ngā kaipōti Māori i te rārangi pōti Māori, i te rārangi pōti whānui rānei ina rēhita mātahi rātau ki te pōti, ā, ka āhei ki te whakawhiti rārangi ahakoa te wā, engari kaua i te 3 marama i mua i tētehi pōtitanga.
‘Ko ngā Māori e hiahia ana ki te whakawhiti rārangi pōti i mua i te Pōtitanga ā-Motu 2023 me whakawhiti i mua i te 13 o Hūrae i te waenganui pō. Kāhore e āhei koe ki te whakawhiti rārangi i waenganui i te 14 o Hūrae me te rā pōti, arā, te 14 o Oketopa. Ka āhei anō ki te whakawhiti ā muri i te pōtitanga,’ hei tā te Amokapua, hei tā Karl Le Quesne.
Hei te pōtitanga o tēnei tau, ka pōti ia kaipōti o te rārangi Māori mō tētehi kaitono o tōna rohe pōti Māori, ā, ka pōti ia kaipōti o te rārangi whānui mō tētehi kaitono o tōna rohe pōti whānui. Ahakoa te rārangi e noho nā te kaipōti,kotahi anake te rārangi o ngā rōpū tōrangapū hei pōti mā te kaipōti ki tāna pōti ā-rōpū.
‘E tātau mā, ko te kainamu mai te rā aukati, arā te 13 o Hūrae, mō te hunga kua rēhita kē ki te pōti. Tēnā, whakaarohia te rārangi e noho nā koe; koirā te rārangi e hiahia nā koe hei rārangi pōti mōu i te pōtitanga nei?,’ te kī a Hone Matthews, a te Amo Māori.
‘Mehemea e pai ana ki a koe te rārangi e noho nā koe, kāhore he mahi nō hei mahi māu. Mehemea e hiahia ana koe ki te whakawhiti i te rārangi whānui ki te rārangi Māori, i te rārangi Māori rānei ki te rārangi whānui, me whakawhiti ināianei.
‘Kia kaha hoki ki te kōrero ki āu tamariki, ki āu mokopuna; kua rēhita rātau? Kāhore he rā aukati mō te kaipōti e rēhita mātahi ana ki te pōti – mehemea ko te rēhita mātahi mai koe, ka āhei koe ki te rēhita, ki te kōwhiri hoki i tō rārangi pōti, tae atu ki te rā pōti, arā, ka āhei tonu ki te rēhita ā te rā pōti tonu,’ hei tā Hone Matthews.
I waenga i te 31 o Māehe me te 22 o Hune, 11,835 ngā tāngata i whakawhiti rārangi - 6,389 i whakawhiti i te rārangi whānui ki te rārangi Māori, ā, 5,446 i whakawhiti i te rārangi Māori ki te rārangi whānui. Kua 1,360 ngā rēhitatanga hou i te rārangi Māori, ā, kua 727 ngā rēhitatanga hou i te rārangi whānui.
Ka āhei tātau ki te haere ki vote.nz ki te rēhita, ki te whakahou i ngā taipitopito wāhi noho, ki te whakawhiti rārangi rānei. Ka āhei hoki ki te waea mai ki 0800 36 76 56 ki te tono kia tukua atu he puka rēhita ki a koe i te mēra.
He pārongo nō mō te Kōwhiringa Pōti Māori, he rauemi hoki hei tuari atu, tatū atu ki ngā rauemi kua tuhia ki ētehi mita o ngā rohe pōti Māori, kei vote.nz.