Kua whiwhi koe i tō mōkī Kōwhiringa Pōti Māori?
Ko te tikanga kua whiwhi ngā kaipōti Māori i tētahi mōkī mōhiohio i roto i te mēra mō te Kōwhiringa Pōti Māori 2018.
Kua tukuna atu ngā mōkī ki ngā kaipōti rēhita i kī he uri 477,141 Māori rātau, e whai kōwhiringa ai rātau ki te rārangi Māori, te rārangi whānui rānei mō ngā pōtitanga e rua e whai ake. 252,051 o aua kaipōti i runga i te rārangi Māori, ā, 225,090 i runga i te rārangi whānui. 7,686 o ngā mōkī i tukuna atu ki ngā wāhi noho i tāwāhi - 6,151 o rātau i Ahitereiria.
"Ko ngā kaipōti e rata ana ki te rārangi kei runga kāore he paku mahi mā rātau, engari mēnā e hiahia ana rātau ki te huri rārangi, ka taea tērā te whakatutuki ināianei mā te waitohu me te whakahoki i te reta i rō mōkī," te kī a Mandy Bohté, Kaiwhakahaere ā-Motu o te Rēhita me te Whitiwhiti ā-Iwi.
Kāore pea ngā kaipōti Māori i whiwhi i tētahi mōkī mōhiohio mēnā kua rerekē te wāhi noho, kāore rātau i kī he uri Māori rātau i te rēhitatanga, kāore anō rānei kua rēhita.
"Mēnā he Māori koe, ā, kāore koe i whiwhi i tētahi mōkī, ka taea tonu e koe te whakauru ki te Kōwhiringa mā te whakakī i tētahi puka rēhita hou," te kī a Ms Bohté. "Me whakatutuki ināianei kia taea e koe tō kōwhiringa te tuku ko tēhea te rārangi e hiahia ana koe te eke ki runga - te rārangi Māori, te rārangi whānui rānei.
I tētahi pōtitanga whānui, ka pōti ngā kaipōti kei te rārangi Māori mō tētahi kaitono i tētahi rohe pōti Māori, ā, ko ngā kaipōti rārangi whānui ka pōti rātau mō tētahi kaitono kei tētahi rohe pōti Whānui. Ahakoa te rārangi kei runga te kaipōti, ka kōwhiri ia mai i aua rārangi tōrangapū ōrite ina tukuna e rātau tā rātau pōti rōpū.
Haere ki www.maorioption.org.nz, waea koreutu rānei ki te 0800 36 76 56 mō ētahi atu mōhiohio. Ka taea ngā puka rēhita te tikiake mai i te paetukutuku, ā, ka taea ngā puka kua whakaotihia te tukuatu ki te paetukutuku.
Ka kati te Te Kōwhiringa Pōti Māori ā te 2 o Hereturikōkā.