Ka puta ngā mōkī ki nga kaipōti 3.15 miriona
Neke atu i te toru miriona ngā mōkī ka tukuna atu i tēnei wiki i te wā e whakarewa ana Te Kaitiaki Take Kōwhiri i tana kaupapa ki te rēhita kaipōti mō te Pōtitanga Whānui 2017.
Kei te tukuna atu ngā mōkī whakahou rēhita whaiaro ki ngā kaipōti katoa kua rēhitatia, ā, ka tae atu ki ngā pouaka mēra i ēnei rā tata nei. Kei roto i te mōkī ko tētahi puka e whakarārangi ana i ngā taipitopito rēhita onāianei o te tangata me tētahi wāhi hei tuhi i ngā whakatikatanga.
"Tāria te kōpaki ko Tangata Karaka kei mua," te kī a te Āpiha Pōti Matua, a Alicia Wright. "Me huaki ka tirotiro i ngā taipitopito – mēnā kei te tika, kāore koe e paku aha, ā, kua reri koe ki te pōti i te pōtitanga o tēnei tau.
"Mēnā me whakatikatika ētahi o ō taipitopito, otirā mēnā i huria e koe tō ingoa, tō wāhi noho rānei, me whakakī te puka, ka waitohu, ka whakahoki mai mā te kōpaki whakahoki," te kī a Ms Wright.
"Ko ngā kaipōti anake kua tika te rēhita ka taea te pōti hei te Mahuru, nō reira he mea nui kia whakatikatikahia mai tō rēhita ināianei tonu," te kī a Ms Wright.
Ki te kore e tae atu he reta ki ngā kaipōti i mua i te Paraire, ko te tikanga o tērā kāore anō rātau kia rēhita, me whakahou rānei i ā rātau taipitopito.
“He māmā noa ki te rēhita," te kī a Alicia Wright. “Ka taea e koe te haere atu ki www.elections.org.nz, tīkina rānei he puka rēhita mai i tētahi PostShop. Ka taea anō e koe te tono tētahi puka mā te waea ki 0800 36 76 56, mā te patowaea rānei i tō ingoa me te wāhi noho ki 3676."
Ki te tae atu tētahi mōkī rēhita i tēnei wiki mō tētahi tangata kāore i te noho ki tērā wāhi, me tuhi "return to sender" ki runga ka whakahoki atu ki te pōhi kia mōhio ai te Kairēhita o ngā Kaipōti o tō rohe kua kore taua kaipōti e noho ki taua wāhi.