Te Wā Whakamutunga ki te Rēhita mō te Pōtitanga Motuhake o Northland
Mēnā kei te hiahia koe ki te pōti i te pōtitanga motuhake o Northland ka mutu kāore koe i te rēhita, kei te pau haere te wā. Koinei te kōrero a te Kairēhita Kaipōti o Northland a Deborah Darton, ā, kei te tata haere mai te wā ki te pōtitanga motuhake hei te Rāhoroi, te 28 o Poutūterangi.
"Ko te tikanga kua tae atu ngā mōkihi PōtiNgāwari ki ngā tāngata katoa kua rēhita mō te pōtitanga motuhake o Northland," tana kī. "Mēnā kāore anō tō mōkihi PōtiNgāwari kia tae atu ki tō poukamēra, me rēhita koe, me whakahou rānei koe i ō taipitopito ināianei. Kia maumahara, ko te hunga anake e rēhita ana ki te rārangi whānui i te rohe pōti o Northland e āhei ana ki te pōti i te pōtitanga motuhake."
He māmā te rēhita, te whakahou rānei i ō taipitopito rēhita. E wātea ana ngā puka whakauru katoa i ngā wāhi pōti tōmua katoa me ngā PostShop, ā, ka taea anō te whakakī tuihono ka tā me te whakahoki.
"Engari me hohoro koe," te kī a Ms Darton. "Me mātua rēhita koe i mua o tēnei Paraire, te 27 o Poutūterangi. Kāore koe e āhei te rēhita hei te rā pōti."
Mō te āhei mai ki te rēhita ki te rohe pōti o Northland me mātua:
- Eke o tau ki te 18, neke atu rānei; me
- Kirirarau, kainoho tūturu rānei koe nō Aotearoa kua 12 marama tō noho ki Aotearoa i tētahi wā; me
- Te noho ki te rohe pōti o Northland mō te kotahi marama, neke atu rānei.
"Mēnā he Māori koe, ka mutu kei te rēhita koe mō te wā tuatahi, ka taea e koe te whiriwhiri mēnā ka eke atu koe ki te rārangi Māori, te rārangi Whānui rānei," hei tā Ms Darton. "Ki te rēhita koe ināianei ka mutu ka kōwhiri koe i te rārangi Māori, ka uru koe ki te rārangi pōti o Te Tai Tokerau, ā, kāore koe e āhei ki te pōti i tēnei pōtitanga-motuhake. Ki te rēhita koe ināianei me te kōwhiri i te rārangi Whānui mō te rohe pōti o Northland, ka āhei koe ki te pōti i tēnei pōtitanga motuhake. Ko te rārangi ka kōwhiria e koe ināianei koinā tō rārangi pōti i te pōtitanga whānui e whai ake. Ahakoa te rārangi ka pōti koe, kāore koe e taea te huri i tō momo rārangi pōti kia eke anō ai te Kōwhiringa Pōti Māori whai ake hei te tau 2018."
E wātea ana he mōhiohio atu anō i www.elections.org.nz.