E 380,000 ngā tāngata kāore pea e whai wāhi ki te pōti ngāwari
Kei te pau haere te wā mō ngā tāngata e hiahia ana ki te tuku pōti ngāwari i te pōtitanga whānui hei te 20 o Mahuru.
E 380,000 ngā tāngata o Aotearoa kāore anō kia rēhita ki te pōti, ā, neke atu i te haurua o rātau kei raro i ngā tau 30.
“Kaua e mahue. Me rēhita i mua o te 20 o Hereturikōkā kia whiwhi ai koe i tētahi mōkihi PōtiNgāwari i mua tonu o te rā pōtitanga," hei tā Murray Wicks, Kaiwhakahaere ā-Motu, Ngā Ratonga Rēhita. "Kei roto ko tō kāri PōtiNgāwari, e ngāwari ake ai, e tere ake ai hoki te pōti i taua rā."
Kei te āta whakatītina Te Kaitiaki Take Kōwhiri i te hunga rangatahi me rātau e pōti ana mō te wā tuatahi kia rēhita i mua o 20 o Hereturikōkā.
"He mea tino nui tō mōkihi PōtiNgāwari mēnā koinei tō tuku pōti tuatahi, i te mea kei roto ko ngā whakamārama me pēhea, āhea, ā, me pōti hoki mō wai," hei tā Mr Wicks. " "Me rēhita ināianei, kia ngāwari ai te pōti."
Ko te rā kati mō te rēhita kia whakaurua atu ki te rārangi rohe pōti tā, ka whakamahia ki ngā wāhi pōti me te tukutanga i ngā kāri PōtiNgāwari, ko te Wenerei te 20 o Hereturikōkā.
Ko te hunga ka rēhita i muri o te 20 o Hereturikōkā me tuku pōti whakapuakanga motuhake.
"Ka taea tonu e koe te rēhita ki te pōti, ā, tae atu ki te rā i mua o te rā pōtitanga", hei tā Mr Wicks, "engari e kore koe e whiwhi i tētahi kāri PōtiNgāwari ka mutu me tuku pōti whakapuakanga motuhake koe."
"He tino roa rawa atu te tuku pōti whakapuakanga motuhake i te tuku pōti ngāwari, ka mutu me whakakī anō e koe ētahi puka atu anō. Ka taea anō e koe te pōti me te kore kāri PōtiNgāwari engari he roa ake tēnei."
"He ngāwari te rēhita. Ka taea e ngā kaipōti te tuku patokoreutu i tō rātau ingoa, wāhi noho hoki ki 3676, te tiki puka mai i tētahi PostShop, te Waea Koreutu rānei ki 0800 36 76 56. Ka taea anō e koe te rēhita, te whakahou tuihono rānei i ō taipitopito i www.elections.org.nz.”
E wātea ana he kōrero atu anō mō te rēhita me te pōti i www.elections.org.nz.