Tīmata ai te Kōwhiringa Pōti Māori I tō Pouaka Mēra
Mēnā he Māori koe i runga i te rārangi pōti, tirohia tō pouaka mēra ā te Mane. Neke atu i te 427,000 ngā mōkihi Kōwhiringa Pōti Māori karaka ka tukuna haerehia ki te motu whānui atu i te Mane te 25 o Poutū-te-rangi – te rā tuatahi o Te Kōwhiringa Pōti Māori 2013.
"Ko te hunga katoa i rēhita ki te pōti, i kī rātau he uri Māori rātau, ka tukuna ā rātau mōkihi Kōwhiringa Pōti Māori whaiaro ki a rātau i roto i te mēra ā te Mane," hei tā Murray Wicks, Kaiwhakahaere Ratonga Rēhita ā-Motu. "Ahakoa kei te rārangi Māori koe, te rārangi Whānui rānei."
"Ko te Kōwhiringa Pōti Māori anake tō whai wāhitanga ki te whakawhiti i waenga rārangi, nō reira he mea nui tonu kia huakina tō mōkihi," te kī a Mr Wicks. "Kei roto ngā mōhiohio mō te kōwhiringa me tōna tikanga, me te puka e hiahiatia hei whakarite i tō hiahia."
Ki te kōwhiri koe i te rārangi Whānui, ka pōti koe mō tētahi MP i tētahi Rohe Pōti Whānui mō ngā Pōtitanga Whānui i ngā tau 2014 me te 2017. Ki te kōwhiri koe i te rārangi Māori, ka pōti koe mō tētahi MP i tētahi Rohe Pōti Māori mō ngā Pōtitanga Whānui i ngā tau 2014, me te 2017," ka kī a Mr Wicks. "Engari kāore e whai pānga ki ngā rōpū kōwhiri hei whiriwhiri māu me tō pōti rōpū."
"Me whakakī noa iho koe i te puka mēnā e hiahia ana koe ki te whakawhiti mai i te rārangi Whānui ki te rārangi Māori, mai i te rārangi Māori ki te rārangi Whānui rānei, te whakahōu rānei i ō taipitopito."
Ki te whiwhi te tangata i tētahi mōkihi a tētahi tangata kua kore kē e noho ana i taua wāhi noho, me tuku te mōkihi ki te wāhi noho hou, me tuhi rānei 'return to sender' ka whakahoki mā te pōhi.
"Ki te kore koe e whiwhi mōkihi kāore koe i te rēhita tika ki te pōti. Ko tāu noa iho he whakakī i te puka rēhita, he māmā tērā," hei tā Mr Wicks.
Mō te whiwhi puka patokoreututia tō ingoa me tō wāhi noho ki 3676, waea ki 800 36 76 56, haere rānei ki tētahi PostShop. Ka taea anō e koe te rēhita, te whakahou tuihono rānei i ō taipitopito i http://www.elections.org.nz/.
Ko ngā tāngata Māori, ngā uri o ngā tāngata Māori anake e āhei te rēhita ki te Rārangi Pōti Māori. I raro i te Electoral Act, ko te nuinga atu o te hunga ehara i te Māori nō Aotearoa me rēhita ki te Rārangi Whānui.
E 427,000 ngā tāngata i rēhita hei kaipōti Māori. E 235,000 kei te Rārangi Māori, ā, 192,000 kei te Rārangi Whānui.
Ka whakamahia ngā hua o te Kōwhiringa Pōti Māori me ngā hua o te Tatauranga Whānui 2013 ki te whiriwhiri kia hia te maha o ngā Rohe Pōti Māori, Whānui hoki ki roto o te Pāremata me te whakahou anō i ngā rohenga pōti.
E wātea ana he mōhiohio atu anō mō te Kōwhiringa Pōti Māori i http://www.elections.org.nz/.