Kua Tata Pau Te Wā Hei Whai Wāhi Ki Te Pōtitanga Motuhake I Te Tai Tokerau
E pau haere ana te wā hei whakauru ki te pōtitanga motuhake o Te Tai Tokerau – me te wiki kotahi te toe ana ā kati rawa te whakaurunga.
“Kāore anō kia tōmuri rawa, heoi he torutoru noa ngā rā kei te toe hei whakauru, hei whakahōu rānei i ō kōrero whakauru e whai wāhi ai ki te pōti i te pōtitanga motuhake o Te Tai Tokerau,” e kī ana a Stephen Hansen, Kairēhita o ngā Kaipōti mō te Rohe Pōti o Te Tai Tokerau.
“Kua whiwhi kē ngā tāngata katoa kua whakauru ki te rohe pōti o Te Tai Tokerau ki ā rātou mōkī PōtiNgāwari i te mēra ināianei. Mēnā kāore anō i tae atu tō mōki PōtiNgāwari ki tō pouaka mēra, me whakauru koe, me whakahōu rānei i ngā kōrero mōu.
“Ko tētahi tangata kāore anō kia whakauru, kei tana rārangi heimahi rānei taua mahi, me anga ki te whakauru ināianei. Ko te wā whakamutunga hei whakauru ko te Paraire/Rāmere, 24 Hūne/Pipiri. Tē taea te whakauru ā te rā pōtitanga,” e kī ana a Stephen Hansen.
Ko te tikanga tino tere hei whakauru ko te haere ki te paetukutuku Pōtitanga www.elections.org.nz me te whakakī i te puka whakauru, tāngia, hainatia me te rā, ā, mēratia, waea whakaahuatia, matawaitia rānei ka tuku mā te īmēra.
Haere rānei ki tētahi PostShop me te whakauru i reira.
E whaimana ai koe ki te pōti ki te rohe pōti o Te Tai Tokerau:
- Kia 18 neke atu ō tau; ā
- Nō ngā kāwai Māori nō Aotearoa koe; ā
- He kirirarau nō Aotearoa koe, he kainoho pūmau rānei kua noho pūmau hoki ki Aotearoa mō te 12 marama i tētahi wā; ā
- Kua noho kotahi marama neke atu ki te rohe pōti o Te Tai Tokerau.