Kei rō mēra ngā mōkī Kōwhiringa Pōti Māori
Ka tukuna atu ngā mōkī mōhiohio ki ngā kaipōti Māori 477,000 hei tēnei wiki i te tīmatanga o te Kōwhiringa Pōti Māori 2018.
Ka tū taua Kōwhiringa mai i te 3 o Paengawhāwhā ki te 2 o Hereturikōkā, ā, koinei te wā e āhei ana ngā kaipōti Māori ki te kōwhiri mēnā me eke atu ki te rārangi Māori, ki te rārangi Whānui rānei mō ngā pōtitanga whānui e rua e whai ake. Ka pōti ngā kaipōti kei te rārangi Māori mō tētahi kaitono i tētahi rohe pōti Māori, ā, ko ngā kaipōti kei te rārangi Whānui ka pōti mō tētahi kaitono kei tētahi rohe pōti Whānui.
"Tāria tō mōkī Kōwhiringa Pōti Māori ka tukuna atu ki tō pouaka mērā i tēnei wiki," te kī a Mandy Bohté, Kaiwhakahaere ā-Motu o te Rēhita me te Whitiwhiti ā-Iwi. "Ka whakamōhio atu i a koe kei tēhea rārangi koe, ā, me te tuku wāhanga mōu ki te huri i te momo rārangi.
"Mēnā e pai ana ki a koe te rārangi kei runga koe, kāore he mahi atu anō māu. Mēnā e hiahia ana koe ki te huri rārangi, me waitohu i te reta ka whakahoki mai," te kī a Ms Bohté. Ka taea te reta te whakahoki atu mā te pōhi, me tukuatu rānei ki www.maorioption.org.nz.
Kei te tukuna atu ngā mōkī ki ngā tāngata i kī he uri Māori rātau i tō rātau rēhitatanga ki te pōti. Kāore e whiwhi mōkī ngā kaipōti mēnā kua rerekē te wāhi noho, kāore rātau i kī he uri Māori rātau i te rēhitatanga, kāore rānei i te rēhita.
"Mēnā he kaipōti Māori koe, ā, kāore koe i whiwhi i tētahi mōkī i te pōhi, haere ki tā mātau paetukutuku ki te tikiake i tētahi puka rēhita," te kī a Ms Bohté. "Ka taea e koe te whakahou ō taipitopito rēhita, me te kōwhiri ko tēhea te rārangi e hiahia ana koe ki te eke atu, i te wā kotahi."
Mō ētahi atu kōrero haere ki www.maorioption.org.nz, waea rānei ki 0800 36 76 56.